NA SONGEA INAPANIA KUWA MMISIONARI: Tarehe 18 Aprili Songea ilishuhudia umati wa waumini waliomiminika na kufurika katika uwanja wa Zimanimoto mjini Songea ili kushiriki katika Kongamano la Uenjilishaji au Umisionari. Waumini wengi waliotoka hasa Maparokia ya mjini Songea, yaani: Parokia ya Mt. Theresia wa Mtoto Yesu Matogoro, Parokia ya Mt. Mathias Kalemba Mulumba ya Songea, Parokia ya Familia Takatifu ya Bombambili, na Parokia ya B. Maria Aliyepalizwa Mbinguni ya Mji Mwema. Pia walijiunga waumini wachache wa maparokia mengine na watu wengine wa madhehebu mengine ya dini. Wamisionari wetu wakongwe na maarufu wa Peramiho, wa Hanga, wa Chipole, na Waaugustiniani wa Mahanje na Wino na watawa wa mashirika mbalimbali walihudhuria kwa wingi sana. Kongamano lilitokana na mpango wa Baraza la Maaskofu wa kutualika Majimbo mbalimbali kushiriki katika Kongamano hilo ili kuhamasisha roho ya utangazaji Enjili au roho ya umisionari kwa daima, na pia ilikuwa ni nafasi ya kutafakari kwa kina juu ya kazi nzuri na kubwa ya umisionari iliyokwisha kutendeka katika eneo hili letu, yaani katika Jimbo Kuu la Songea. Maandalizi na adhimisho la Kongamano hili lilihamasishwa hasa na Kamati ya Uenjilishaji (MAC) ya Baraza la Maaskofu iliyokuwa imeanzishwa na Umoja wa Mashirika ya watawa wanaume. Katika Misa Takatifu iliyoadhimishwa siku hiyo uwanjani Zimani moto, tayari Makatekista 14 walijitokeza na kujieleza kwa Askofu hiari yao ya kwenda missioni na kufanya kazi huko kwaajili ya watu. Na vijana wengine wanne waliamua kujitolea kuwatunza na kuwasaidia mapadre wa Jimbo wanapougua na kulazwa hospitalini. Roho wa Bwana yu juu yetu ili tuwahubirie watu Enjili ya Kristu.
